Маж заврши во болница поради совети од ChatGPT
Шеесетгодишен маж завршил во болница,поради совети од ChatGPT.
Шеесетгодишен маж завршил во болница со сериозни психички проблеми откако почнал да ги следи здравствените совети на вештачка интелигенција.
Иако одамна се предупредува дека пребарувањето симптоми на интернет е ризично, случајот покажува дека и консултација со AI може да има опасни последици.
Мажот бил загрижен за солта во исхраната и нејзините штетни ефекти, па побарал совети од ChatGPT за тоа како целосно да ја исфрли. Системот му предложил да ја замени со бромид – соединение кое во минатото се користело во фармацевтски производи, но денес е познато како токсично во поголеми дози.
Без да знае за ризиците, тој нарачал бромид преку интернет и неколку месеци го користел наместо обична кујнска сол. По три месеци почнал да страда од параноја и халуцинации, па бил примен во болница. Лекарите го дијагностицирале со бромизам – состојба предизвикана од прекумерна изложеност на бромиди.
Оваа интоксикација може да предизвика конфузија, напади, психози, анксиозност, депресија, па дури и кома. Мажот по три недели хоспитализација бил пуштен на домашна нега.
Стручњаците предупредуваат дека случајот е јасен пример за тоа колку е опасно да се земаат здравствени совети од вештачка интелигенција. Во извештајот е нагласено:
„AI алатките можат да даваат неточни информации и не можат критички да ја оценат сопствената содржина.“
И самите креатори на ChatGPT, во Условите за користење, велат дека услугата не е наменета за медицинска дијагноза или третман.
