Kia K4: Новиот цар во класата Golf
Kia K4 ја редефинира компактната класа со нов дизајн, напредна технологија и голем простор. Детални спецификации и опрема.
Kia K4: Компакт што влегува со големи амбиции
Kia реши да го освежи теренот по брановите електрични модели и да се врати со класичен бензински адут – новиот K4, директниот наследник на легендарниот Ceed. И да, цените во Германија стартуваат од 29.990 евра, што е малку повисоко од очекувањата, но K4 не доаѓа да игра на ситно – доаѓа да доминира во класата Golf.
По три генерации, Ceed оди во заслужена пензија, а K4 го презема кормилото со нова номенклатура, поголеми димензии и впечатлив дизајн. Долг 4,44 метри и со меѓуоскино растојание од 2,72 метри, K4 е видливо порастен во споредба со својот претходник. Просторот во багажникот – 438 литри, па дури до 1.217 литри со спуштени задни седишта – јасно става до знаење дека ова веќе не е „малиот Ceed“, туку поголем и поамбициозен модел.
Кокпит: дигитален, модерен и сериозно опремен
Во внатрешноста те пречекуваат два 12,3-инчни екрани што го обединуваат управувањето со навигацијата и дигиталната табла. Kia го носи најновиот инфозабавен систем ccNC, дополнет со гласовен асистент со вештачка интелигенција (првата година бесплатно), видео стриминг, Wi-Fi hotspot и безжична интеграција со телефони. Тука се и ажурирања преку интернет и можност за плаќање директно од автомобилот.
Опрема што тешко се игнорира
K4 не доаѓа „основно“, туку веднаш нуди LED фарови, навигација, панорамски дисплеј, двозонска клима, паметен клуч, греење на седишта и голем пакет системи за безбедност:
- помош при возење на автопат
- предупредување за судир
- активна контрола на слепа точка
- адаптивен темпомат
- систем за откривање на поспаност
- седум воздушни перничиња, вклучувајќи и централно
За оние што сакаат „трошење на лепчиња на опција“, листата продолжува со Digital Key 2.0, head-up дисплеј, Harman/Kardon аудио, вентилирани седишта, греење на задни седишта и камера со поглед 360°.
Kia K4 не доаѓа да биде скромен наследник – доаѓа да постави ново правило во компактната класа. Прашањето е само дали Golf конечно доби сериозен ривал што му дише во врат… или веќе му гази на педалата.
