Како жените над 50 одржуваат здраво тело
Откриј ја наједноставната навика што го зајакнува телото, енергијата и здравото стареење кај жените над 50 години.
Велат дека возраста е само бројка, но за многу жени, влегувањето во педесеттите години претставува вистинска пресвртница. Телото минува низ бројни промени поврзани со менопаузата — од топли бранови и промени во метаболизмот, до намалување на густината на коските и мускулната маса. Наместо уште една шолја кафе за борба со попладневниот замор, експертите препорачуваат поедноставен и поефикасен начин за одржување на енергијата и здравото стареење: попладневна прошетка, пишува EatingWell.
Зошто одењето е клучно по 50-тата година?
Дури и кратка прошетка на свеж воздух од 15 до 20 минути може значително да го подобри здравјето на срцето и целокупната виталност, објаснува д-р Сара Матис. Одењето е едноставна, но исклучително ефективна физичка активност што го намалува крвниот притисок, го зголемува „добиот“ HDL холестерол и ја поттикнува циркулацијата.
„Попладнето е клучен момент. Одењето ги разбива седечките навики, го поддржува циркадијалниот ритам поврзан со хормоналната рамнотежа и обезбедува природен поттик на енергија и расположение токму кога најмногу недостига“, вели Матис.
Покрај тоа, одењето по оброк помага да се стабилизира нивото на шеќер во крвта — особено важно за жените кои влегуваат во менопауза, кога расте ризикот од дијабетес тип 2. Со движењето, глукозата полесно се пренесува во мускулите каде што се користи како енергија, што спречува енергетски пад и го намалува ризикот од метаболички нарушувања.
Придобивки за коските и мускулите
Околу една од пет жени над 50 години развива остеопороза. Затоа е клучно да се воведат активности што ги зајакнуваат коските. Одењето, како вежба со низок интензитет, го одржува коскеното ткиво и го намалува ризикот од фрактури. Истражувањата покажуваат дека редовното одење ја подобрува густината на коските во споредба со неактивниот начин на живот.
Дополнително, одењето ги прекинува долгите периоди на седење — фактор што придонесува за забрзано стареење и губење на мускулна сила.
Колку треба да се оди?
Д-р Ренди Гулд препорачува жените над 50 години да имаат најмалку 150 минути умерена аеробна активност (како брзо одење) или 75 минути енергична активност неделно. Во пракса, тоа значи околу 20 минути брзо одење дневно — идеално за време на паузата на работа или по вечерата.
Како да го направите одењето секојдневна навика
- Изберете удобни чевли: Патиките со добар квалитет го олеснуваат секој чекор.
- Најдете друштво: Пријател, партнер или домашно милениче ќе ја зголемат мотивацијата.
- Направете го забавно: Слушајте музика, подкаст или аудиокнига.
- Менувајте рути: Истражувајте нови улици, паркови и патеки за да го задржите интересот.
Редовното одење не бара специјална опрема или подготовка, а носи големи здравствени придобивки. Тоа е наједноставниот чекор кон подолг, посилен и поздрав живот по педесеттата година.
