Тина Русева од Македонија, ги крена сите на Voice of Germany
Македонката Тина Русева ги крена сите на нозе, на познатото шоу Voice of Germany!
Дваесетгодишната Тина Русева, родум од Струмица, а со години живее во Леверкузен, Германија, воодушеви со својот настап на реномираното музичко шоу „Гласот на Германија“.
Вчерашното телевизиско издание, во кое настапи токму нашата Тина, предизвика вистинска еуфорија меѓу жирито и публиката.
Русева се претстави со динамичната изведба на песната „Do It Like a Dude“ од Џеси Џеј. Членовите на жирито речиси истовремено ги притиснаа копчињата за избор, изразувајќи безрезервно воодушевување од нејзината интерпретација и сценски настап.
Публиката ја пречека со громогласни аплаузи и пеење во еден глас, што ја заокружи атмосферата на вистински музички спектакл. Видеото од изведбата за кратко време стана вирално на социјалните мрежи, а реакциите и пофалните коментари не престануваат да пристигнуваат.
„Реткост е да се види толку талент и самодоверба“
„Ова е само почеток на блескава кариера“
„Најдобрата интерпретација на оваа песна што досега сум ја слушнал“
– се дел од многубројните впечатоци на гледачите.
Поддршката за младата уметница доаѓа од сите страни, но најсилна е, секако, семејната. На настапот присуствуваа и нејзините родители, кои и самите се занимаваат со музика.
Мајката Верица е пејачка, а таткото Љубе професионален тапанар – музички темел врз кој Тина го гради својот пат.
По настапот, Тина преку својот профил на социјалните мрежи упати порака што ги трогна многумина: „Малиот сон го претворив во реалност – четката за коса ја заменив со микрофон.“ Со тоа, таа испрати силна порака до своите врсници дека талентот и упорноста се клучот за остварување на соништата.
