Пирамидата на Зоран Витанов пресуши
Банкротираше Лајонес, неизвесна е судбината и на Лајконет!
MyWorld, кешбек платформата која се спои со Лајонес и стана најпозната како нејзин наследник е во стечај. Со тоа, неизвесна е судбината и на Лајконет, фирмата за мрежен маркетинг чиј единствен клиент е myWorld, објави порталот Фактор.мк.
Од Фактор побарале став и од Зоран Витанов, долгогодишен претставник и акционер во „Лајконет Аустриа ГмбХ“ која е сопственик и на „Лајконет Македонија“, а чија иднина сега е во прашање поради стечајот. Тој вели дека не може да зборува во името на „мајВорлд“, но ја потврдил информацијата за стечајот.
„Да, има активен стечај, меѓутоа myWorld. Јас не сум релевантен да зборувам за myWorld. Лајконет е маркетинг агенција која што е регистрирана само со една единствена намена – да има ексклузивно право по принцип на мрежен маркетинг да ја промовира myWorld. Но, се уште си функционира кешбекот. Бидејќи Лајконет има само еден клиент, а кој сега е под стечај, автоматски Лајконет престанува да функционира додека има активен стечај“, рече Витанов за Фактор.
Сопственик на главните фирми на мајВорлд и Лајконет е Австриецот Хуберт Фрајдл, чие богатство е проценето на 500 милиони долари.
Ова е лоша вест за Македонците, бидејќи многумина особено млади луѓе се дел од оваа пирамидална шема која нуди кеш-бек услуги, односно враќање на дел од парите при купување со „Лајонес“ картичка во местата каде што е склучно соработка за користење на услугите. Со години многу луѓе одат на семинари, вложуваат и ги слушаа советите на Зоран Витанов, за оваа мрежа на која и се заканува дебакл.
