Москва обвинува: Украина планира саботажа на самитот Трамп–Путин
Русија тврди дека Украина подготвува провокација во Харков пред самитот Трамп–Путин во Алјаска, наводно за да ја наруши руско-американската соработка.
Портпаролката на руското Министерство за надворешни работи, Марија Захарова, денеска изјави дека Киев планира „криминална провокација“ во пресрет на долгoочекуваниот самит меѓу Доналд Трамп и Владимир Путин, закажан за 15 август во Алјаска.
„Криминалните провокации веќе станаа белег на режимот во Киев“, рече Захарова, коментирајќи ги информациите на руското Министерство за одбрана. Таа нагласи дека станува збор за намерен обид да се попречат разговорите меѓу Москва и Вашингтон.
Обвинувања за напад со цивилни жртви
Според тврдењата на руското Министерство за одбрана, украинските вооружени сили планираат напад во регионот Харков непосредно пред самитот. Како цел, наводно, се избрани густо населена станбена област или болница, при што би се користеле беспилотни летала и ракетни системи.
Русија тврди дека ваквиот напад би резултирал со голем број цивилни жртви и дека сцената веднаш би била документирана од „увезени западни новинари“, со цел создавање силна медиумска кампања против Москва.
Целта според Москва
Руските власти наведуваат дека Киев ќе се обиде да ја префрли вината врз руските вооружени сили. Според нив, крајната цел е да се создаде негативна медиумска позадина и да се блокира било каков напредок во руско-американската соработка за решавање на конфликтот во Украина.
