Микропластика во организамот на човекот, дали ова води кон глобална неплодност?
Новите истражувања откриваат присуство на микропластика во човечките јајници и сперма. Научниците се загрижени за потенцијалното влијание врз плодноста и репродуктивното здравје.
Микропластиката веќе не е само проблем на морињата или на рибите што ги јадеме. Таа е официјално во нас – во белите дробови, во крвта, црниот дроб, па дури и во мозокот. Но најновото откритие објавено во списанието Human Reproduction го дига алармот на сосема ново ниво: микропластика е откриена и во човечките јајници и сперматозоиди.
Научниците анализирале семена и фоликуларна течност кај 51 испитаници (29 жени и 22 мажи) и резултатите се фрапантни: микропластика била пронајдена кај 69% од жените и 55% од мажите.
„Очекувавме да ја најдеме, но не толку често. Ова е навистина загрижувачки,“ изјави д-р Емилио Гомез-Санчез на годишниот конгрес на Европското друштво за човечка репродукција и ембриологија (ESHRE).
Што точно влегува во нас?
Најчести видови микропластика детектирани во примероците:
PTFE (тефлон) – 41%
Полистирен (стиропор) – 14%
ПЕТ (полиетилен терефталат) – 9%
Најлон (полиамид) – 5%
Полиуретан – 5%
Тоа се материјали што секојдневно ги користиме во пакувања, кујнски садови, облека, па дури и во козметика.
Зошто ова е опасно?
Според досегашните истражувања врз животни, микропластиката во телото предизвикува воспаленија, оксидативен стрес, оштетување на ДНК, стареење на клетките и хормонски дисбаланс. Звучи познато? Да, тоа се истите проблеми што го намалуваат квалитетот на сперматозоидите и јајце клетките кај луѓето.
Иако директна врска со неплодност сè уште не е докажана кај луѓето, трендот на опаѓање на плодноста глобално (особено во САД и Европа) веќе не може да се игнорира.
Микропластика = една супена лажица за вечера?
Научниците проценуваат дека просечен човек внесува околу 5 грама микропластика неделно – тоа е една супена лажица. Годишно – 250 грама. Тоа е цел чинија пластика.
Изворите на внесување се две:
Преку храна и пијалоци – особено вода од пластични шишиња и прехранбени производи чувани или зготвени во пластика.
Преку вдишување на честички од воздухот, особено во урбани и затворени простори.
Што може да се направи?
Д-р Гомез-Санчез вели нема уште простор за паника ама сепак треба да се внимава:
„Нема место за аларм, но треба да ја намалиме изложеноста.“
Неколку практични совети:
Користи стаклени садови наместо пластика, особено за храна.
Избегнувај вода во пластични шишиња.
Намали купување на брза храна и преработени производи.
Прочистувачи на воздух дома? Не е луксуз, туку инвестиција.
