Македонец најмен да убие навивач кој беше цел и на Газела?
Македонецот Мартин Сипковски (21), кој загина во експлозија во стан на улицата Косовска во Белград, наводно бил ангажиран да го убие лидерот на навивачите на Партизан – Тадија П. (23) од Земун, кој беше нападнат на мостот „Газела“ ова лето.
Тадија П., еден од водечките членови на навивачката група на Партизан од Земун, беше мета на напад во јуни годинава. Камерите тогаш снимија група напаѓачи на скутери како ги опкружуваат автомобилите што ги превезуваа навивачите на Партизан кои се враќаа од кошаркарски натпревар.
Според кривичната пријава што полицијата ја поднесе до Вишото јавно обвинителство во Белград по инцидентот, постојат основи за сомневање дека Мирослав Ј. Г., Драган С., Воислав Б. и Влада В., во претходен договор со други неидентификувани лица, со неколку мотоцикли се упатиле кон булеварот Арсенија Чарнојевиќ и, кај Сава центарот, се приклучиле на мостот „Газела“ со цел да ги пронајдат навивачите на Партизан кои се враќале од натпреварот меѓу Партизан и Будуќност, одигран во „Белградска арена“.
По кратко време, осомничените и други неидентификувани лица употребиле физичка сила и огнено оружје, при што биле повредени Н. А., А. Г. и Филип К.
Наводно, Тадија П. бил во еден од автомобилите што тогаш биле нападнати на мостот.
„Конфликтот меѓу фракциите на навивачи кои се поврзани со криминални групи трае веќе подолг период. Во станот каде што загина манекенот и поранешен ракометар од Македонија, поради нестручно ракување со експлозивната материја „пентрит“, која има голема разорна моќ, беа пронајдени шифрирани телефони. Тие се запленети, а експертите работат на целосно дешифрирање на пораките. Еден прекар што се појави за време на истрагата за ликвидацијата на Никола Станковиќ – Пивче привлече особено внимание,“ откри изворот.
Никола Станковиќ – Пивче е убиен додека спиел.
За потсетување, Станковиќ беше убиен во декември минатата година, во својот дом. Напаѓачите упаднаа во куќата и го застрелаа додека спиеше во кревет со својата бремена свршеница. Во моментот на убиството, Станковиќ се наоѓал во домашен притвор.
Постојат индиции дека истата група што стои зад убиството на Пивче ја нарачала ликвидацијата на навивачот кој требало да биде разнесен со експлозив. Мартин Сипковски, најверојатно, загинал затоа што не бил доволно обучен да ракува со уредот што требало да се употреби.
Силата на експлозијата предизвикала уривање на преградните ѕидови во станот, пукање на прозорците и рамките, а биле оштетени и автомобилите паркирани пред зградата.
Според изворот, Сипковски починал на самото место, експлозивната направа му ги откорнала прстите, поради што веднаш било јасно дека токму тој ја држел и активирал бомбата.
Избегал од домашен притвор
Македонските медиуми објавија дека адвокатот на Сипковски потврдил дека тој бил во домашен притвор во Скопје, од каде што избегал. Според нив, тој бил осуден на седум години и шест месеци затвор во јуни, поради обид за убиство со нож на улица. Сепак, судијата одлучил да го задржи во домашен притвор до правосилноста на пресудата и да му го одземе пасошот.
„Обвинителството првпат било информирано на 25 септември дека тој не е пронајден во својот дом. Тоа било една недела пред трагедијата во Белград, што значи дека успеал нелегално да ја премине границата,“ соопштија од обвинителството.
По добивањето на ова известување, Основниот кривичен суд во Скопје со одлука ја заменил мерката домашен притвор со притвор.
Филип В. уапсен
Вишото јавно обвинителство во Белград пред неколку дена објави дека Филип В. (26) е уапсен под сомнение дека му го донел експлозивот на Мартин Сипковски, чието тело беше пронајдено по експлозијата што се случи на 1 октомври во стан на третиот кат на улицата Косовска.
Тој е осомничен дека на 30 септември, околу 15 часот, на аголот од улиците Косовска и Нушиќева му предал на Сипковски експлозивна материја – пентрит. Истата вечер, Сипковски, наводно, ја однел експлозивната направа во изнајмениот стан, каде што следниот ден, околу 21:45 часот, со несмасно ракување ја активирал бомбата и загинал.
