Фекални бактерии пронајдени во мусаката и во три чешми во ОУ „Димо Хаџи Димов“
Во училиштето „Димо Хаџи Димов“ откриени фекални бактерии во мусаката и во три чешми; истрагата продолжува под координација на надлежните институции.
Институтот за јавно здравје (ИЈЗ) објави сериозни нови наоди во истрагата за тровањето со храна во ОУ „Димо Хаџи Димов“ во скопската населба Влае. Во узорок од мусаката што била сервирана во прва смена се идентификувани грам-негативни бактерии од групата Enterobacteriaceae, што претставува јасен индикатор за фекално загадување. Истите типови бактерии се откриени и на три чешми во училиштето, што укажува на поширок хигиенски проблем во објектот.
Од ИЈЗ информираат дека примероците се бројни и дека материјали за анализа и понатаму пристигнуваат, што го продолжува процесот на проверка и потврда. Институцијата денеска одржа прес-конференција на која беше презентирано дека со истрагата се вклучени Агенцијата за храна и ветеринарство (АХВ), Државниот санитарен и здравствен инспекторат (ДСЗИ), Центарот за јавно здравје – Скопје и Детската клиника. Сите се во постојана координација и размена на информации.
По прес-конференцијата пристигнале и нови лабораториски резултати, кои повторно потврдиле присуство на фекални бактерии и во храната и на водоводните точки во училиштето.
ИЈЗ најави дека мониторингот ќе продолжи, а јавноста ќе биде навремено информирана за сите следни наоди и мерки што ќе бидат преземени со цел да се утврди изворот на заразата и да се спречи повторување на вакви инциденти.
