Дарко Глишиќ доживеа мозочен удар на телевизија
Драматични сцени во живо, Министерот Дарко Глишиќ доживеа мозочен удар на телевизија, во животозагрозувачка состојба e.
Министерот за јавни инвестиции во Владата на Србија, Дарко Глишиќ, доживеа тежок мозочен удар за време на гостување во живо на телевизијата „Пинк“, по што итно беше хоспитализиран. Состојбата е критична, а српската јавност е во шок поради драматичниот момент кој се одвиваше пред очите на гледачите.
Според информациите што ги објави Блиц, Глишиќ ја загубил свеста среде разговор во студио, по што програмата веднаш била прекината. Тој веднаш бил пренесен во Ургентниот центар во Белград, каде му се прават детални дијагностички испитувања и прима интензивна терапија.
Министерот за здравство, Златибор Лончар, изјави дека ситуацијата е многу сериозна:
„Министерот Дарко Глишиќ е примен во болница во тешка, животозагрозувачка состојба. Без свест, моментално се прават сите неопходни испитувања, и се применуваат најсовремени медицински протоколи. Ќе направиме сѐ што е во наша моќ.“
На самото место веднаш пристигна и претседателот на Србија, Александар Вучиќ, кој му изрази поддршка на својот долгогодишен соработник преку социјалните мрежи:
„Даре, држи се! Нема предавање“, напиша Вучиќ на Instagram.
Глишиќ важи за еден од најблиските и најлојални луѓе во кругот на владејачката Српска напредна странка (СНС). Во партијата е од нејзиното основање, а од 2016 година ја води извршната канцеларија на СНС. Министерската функција за јавни инвестиции ја презеде во мај 2024 година.
Својата поддршка јавно ја изрази и актуелниот лидер на СНС и советник на претседателот, Милош Вучевиќ:
„Дарко, бори се како што секогаш си знаел!“, напиша тој на Instagram.
Настанот предизвика бројни реакции во јавноста, а видеото од моментот кога Глишиќ се онесвестува во живо веќе се шири на социјалните мрежи. Засега, состојбата останува неизвесна, а лекарските тимови продолжуваат со борба за неговиот живот.
