Call of Duty филм во продукција на Paramount
Paramount потврди, ќе има филм по франшизата „Call of Duty“. Откриј што носи овој договор и какви перспективи отвора за гејмерите и филмската индустрија.
Paramount потпиша договор со Microsoft и Activision за снимање филм инспириран од култната франшиза „Call of Duty“.
Иако финансиските детали не се обелоденети, сигурно е дека се работи за една од најпрофитабилните интелектуални сопствености во гејминг индустријата. Paramount ќе биде задолжен за развој, продукција и дистрибуција на филмот, но засега нема информации за актерската екипа, креативниот тим или конкретниот дел од серијалот што ќе биде адаптиран.
Франшизата „Call of Duty“ досега брои повеќе од триесет наслови. Класичните игри би можеле да се преточат во традиционални воени приказни, додека футуристичките наслови отвораат простор за впечатливи научно-фантастични адаптации.
Variety објави дека ова е само почеток. Иако договорот моментално е за еден филм, извори од индустријата укажуваат дека Paramount може да ја прошири франшизата со повеќе филмови и ТВ-серии.
Филмот доаѓа во време кога Paramount заврши спојување со Skydance вредно осум милијарди долари. Новиот медиумски конгломерат веќе ги ангажираше креаторите на „Stranger Things“ од Netflix и издвоил повеќе од 7,7 милијарди долари за ексклузивни права на UFC настани за следните седум години.
Покрај тоа, компанијата најави планови за зголемување на продукцијата, со цел да стигне до дваесет филмови годишно. На гејмерскиот фронт, љубителите ја очекуваат премиерата на „Call of Duty: Black Ops 7“, закажана за 14 ноември.
