Што е „софт клабинг“ – новиот тренд на забави?
„Софт клабинг“ е новата култура на трезна забава што ја редефинира ноќната сцена, обединувајќи танц, здравје и вистински човечки контакт.
Сцената на ноќните излегувања драстично се промени во последната деценија. Клубовите што некогаш беа преполни за време на викендите денес се полупразни, а генерацијата З сè почесто го заменува консумирањето алкохол со активности кои го негуваат телото и умот – од велнес и трчање, до дружења без алкохол.
Овој тренд е забележлив насекаде – од музички фестивали до сè популарни дневни настани кои привлекуваат млади што сакаат „трезна забава“.
Добредојдовте во ерата на „софт клабингот“
Терминот „софт клабинг“ означува нова култура на излегување во која акцентот не е ставен на алкохолот, туку на доброто чувство. Наместо класични ноќни забави до зори, сè поголема популарност добиваат опуштени дружби во кафулиња, домашни собири или забави кои завршуваат пред полноќ.
Во големите светски метрополи како Лондон, Њујорк и Берлин се разви трендот наречен „утрински танц“. Идејата е едноставна – наместо ноќни излегувања со алкохол, луѓето се собираат наутро, меѓу 6 и 9 часот, за да танцуваат со диџеј, да пијат кафе или сок, да јадат нешто здраво и да го започнат денот со позитивна енергија.
„Ова не е одрекување, туку свесен избор за нешто подобро,“ објаснува Розели Илано од „EventBrite“, глобална платформа за организирање на настани. „Станува збор за присутност, намера и радост. Генерацијата З го редефинира поимот излегување – тие избираат искуства кои го хранат телото и душата, а не само адреналинот и вревата.“
Зошто се менува културата на излегување?
Прво, ноќните забави станаа прескапи. Цените постојано растат, па сè повеќе луѓе бараат искуства што нудат повеќе од обично напивање. Сакаат чувство на смисла, заедништво и вистинска поврзаност.
Второ, по пандемијата, многумина чувствуваат поголема осаменост. Наместо во бучни клубови, младите бараат автентични односи и дружења за кои ќе имаат убави спомени – без мамурлак и анксиозност.
Трето, дневните настани се попрактични. Лесно се вклопуваат во секојдневието, оставаат време за одмор навечер и се побезбедни од враќање дома во доцните часови.
Кој го предводи трендот
Брендот Daybreaker веќе повеќе од една деценија организира трезни дневни рејвови во над шеесет градови низ светот, со познати диџеи како Groove Armada.
„Веќе 13 години градиме култура на забава што ги спојува танцот, заедништвото и грижата за себе,“ вели основачката Радха Агравал. „Младите повеќе не сакаат да остануваат до зори – сакаат да се разбудат со енергија. Забавата без алкохол не е тренд, туку здрав избор.“
Слично на тоа, лондонската компанија LAB 54 неодамна организираше техно и хаус-забава која заврши во 18 часот.
Сè популарен е и проектот The House of Happiness, кој нуди класично рејв-искуство со музика, светла и сјај, но без алкохол – и редовно ги распродава своите настани.
Како размислува генерацијата З
„Не мислам дека сме здодевни – само го сменивме начинот на дружење,“ вели 21-годишната Оливија Бенет, која полнолетството го дочекала за време на пандемијата. „Научивме да се забавуваме и поврзуваме без алкохол и без да трошиме богатство.“
Иако на прв поглед изгледа како крај на класичната клубска култура, всушност станува збор за нејзина еволуција. Ноќниот живот повеќе не мора да ја чека ноќта.
