Киндерлада – „сиромашната Нутела“ од Југославија
Киндерлада – „сиромашната Нутела“ што остана во колективната меморија на многу генерации!
Поминаа три децении откако од полиците исчезна еден од најслатките симболи на поранешна Југославија – млечниот намаз Киндерлада. Иако веќе одамна не се произведува, нејзиниот вкус и денес предизвикува носталгија кај генерациите што растеа со полни лажици крем од чаши со насмеана крава.
Киндерладата не беше обична копија на Нутела, туку своевидна алтернатива, достапна на секое семејство. За многумина таа беше „Нутела за сиромашни“ – за оние што не патуваа до Трст или не можеа да си дозволат скапи увозни производи. Иако различна по вкус, остана во срцата токму затоа што ја обележа секојдневната трпеза на едно време.
Вкус на едно детство
Производството започна во 1982 година во фабриката на „Подравка“ во Копривница, во соработка со италијанскиот „Фереро“. Се нудеше во две варијанти – двобојна комбинација од чоколадо и млеко, и бел млечен намаз. Она што ја правеше посебна беше и амбалажата: стаклени чаши, пластични кутичиња, но и порцелански садови што денес вредат како колекционерски трофеи.ж
Симбол на време и пазар
Киндерлада беше дел од економската и културната сцена на едно општество во транзиција. Со распадот на Југославија и навлегувањето на оригиналната Нутела на домашните пазари, производот не можеше да ја преживее конкуренцијата. Во 1995 година последната тегла беше симната од производствената лента.
Носталгија што не бледее
Иако веќе триесет години ја нема, споменот за Киндерлада живее. Старите реклами се враќаат на YouTube, а садовите со логото сè уште кружат на огласници по цени што изненадуваат. За многумина тие не се само предмети, туку парче историја – потсетник на едно детство каде најголемото задоволство беше лажица полна со слатка крема.
