Хаос во Белград, полицијата повторно насилно ги растера луѓето
Во Белград полицијата брутално се пресметува со демонстрантите, луѓето во повеќе градови на Србија беа претепани, по вчерашните конфликти и вечерва во продолжение траат пресметките помеѓу народот и поддржувачите на Александар Вучиќ.
По вчерашното брутално полициско насилство врз демонстрантите, вечерва на улиците во Србија се одржуваат нови големи протести, во сите поголеми градови.
Вчерашните протести беа исполнети со судири меѓу демонстрантите и полицијата и поддржувачите на СНС и Александар Вучиќ во неколку градови, претежно во Белград. Во неколку градови во Србија, полицијата вчера употреби солзавец за да ги растера демонстрантите.
Во Нови Сад, демонстрантите демолираа неколку канцеларии на Српската напредна партија.
Во среда, за потсетување, во Нови Сад и Белград избувнаа насилни судири. Поддржувачи на Српската напредна партија (СНС) и Александар Вучиќ се појавија на улиците, маскирани и вооружени со железни палки. Антивладините демонстранти беа нападнати со огномет, а имаше и судири меѓу полицијата и демонстрантите.
Во Нови Сад, маж, за кој подоцна се покажа дека е војник, извади пиштол и пукаше во воздух, тврдејќи дека демонстрантите против режимот на Вучиќ му се заканиле со живот.
