Томас Парти пуштен од притвор по обвиненијата за силување
Поранешниот фудбалер на Арсенал, Томас Парти, се соочува со пет обвиненија за силување и едно за сексуален напад.
Поранешниот фудбалер на Арсенал и репрезентативец на Гана, Томас Парти (32), доби условна кауција по обвиненија за пет случаи на силување и едно дело на сексуален напад. Обвиненијата се однесуваат на три различни жени и покриваат период од 2021 до 2022 година, додека Парти сè уште настапуваше за лондонскиот клуб Арсенал.
Парти се појави пред Вестминстерскиот магистратски суд во вторникот, облечен во црна маица со патент, црни панталони и носеше темносин сако. Во судницата стоеше мирно, со рацете зад грб, потврдувајќи го своето име и разбирањето на условите за кауцијата.
Според одлуката на судот, Парти нема право да стапува во контакт со ниту една од трите жени кои го обвинуваат, и е должен да ги информира надлежните органи за каква било промена на постојаната адреса или евентуално патување надвор од државата.
Истражната постапка започна во февруари 2022 година, откако полицијата доби прва пријава за силување. Обвиненијата се формално поднесени четири дена по истекот на неговиот договор со Арсенал, кој заврши на крајот од јуни оваа година.
Адвокатката на Парти, Џени Вилтшир, изјави дека нејзиниот клиент „ги негира сите обвиненија против него“ и дека „со нетрпение очекува да го исчисти своето име пред судот“.
Следното рочиште е закажано за 2 септември, на Врховниот суд во Лондон – Олд Бејли, каде што ќе се одлучува за понатамошниот тек на постапката.
Во меѓувреме, Парти е во преговори за нов клуб – се шпекулира дека ќе потпише едногодишен договор со шпанскиот Вилареал, со можност за продолжување на уште 12 месеци.
