Renault 5 е избран за автомобил на годината во Европа

Малиот француски електричен супермини Renault 5 и неговиот „близнак“ од Alpine ја добија наградата за Европски автомобил на годината.

Renault 5/Alpine A290 влезе во потесниот избор за Европски автомобил на годината, добивајќи вкупно 353 поени. Победникот беше прогласен денеска на салонот за автомобили во Брисел, а наградата ја прими шефот на Рено, Фабрис Камболив.

„Ние сме неизмерно горди на оваа престижна награда за автомобил на годината. Renault 5 ги прави електричните автомобили пожелни и инспирира емотивни реакции. Ако постои автомобил со потенцијал да го трансформира електричниот пазар, тоа е овој“, рече Камболив.

Наградата за автомобил на годината се смета за една од најпрестижните во Европа. Победниците ги избира жири составено од 60 автомобилски новинари од 23 земји, а секој автомобил лансиран во текот на изминатата година е кандидат за титулата.

Жирито го зема предвид општиот дизајн, удобноста, безбедноста, економичноста, управувањето и општите карактеристики на патот, перформансите, функционалноста, општите еколошки барања, задоволството на возачот и цената. Техничките иновации и односот инвестиција-поврат се главните фактори.