Пакистан и Авганистан – Вековен конфликт што повторно тлее
Пакистан и Авганистан се на работ на војна – вековен конфликт поради граници, тероризам и историски тензии.
Мировните разговори меѓу Авганистан и Пакистан пропаднаа, но прекинот на огнот меѓу двете соседни земји засега останува на сила. Двете држави со децении се расправаат за границата, тероризмот и контролата на ресурсите, а новиот бран тензии повторно го става регионот на работ на војна.
Граница што никогаш не е призната
Коренот на конфликтот лежи во линијата Дуранд — границата воспоставена во 1893 година меѓу Британската индиска империја и Емиратот Авганистан. Таа е долга 2.640 километри и минува низ области населени со Паштуни, племиња што никогаш не ја признале поделбата.
По поделбата на Британска Индија во 1947 година, Пакистан ја наследи границата, но Авганистан никогаш официјално не ја прифати, што предизвика децениски политички и воени тензии.
Порозна граница и милитантни групи
Паштуните живеат од двете страни на границата и ја преминуваат без контрола, што Пакистан го смета за сериозен безбедносен ризик. Двете земји меѓусебно се обвинуваат дека им даваат засолниште на милитантни групи кои напаѓаат преку границата.
Оваа област е и главна рута за шверц на дрога. Авганистан е најголем производител на опиум и хероин во светот, а голем дел од трговијата поминува низ Пакистан, што дополнително ги затегнува односите.
Судири околу лидерот на Талибанците
Најновите судири започнаа откако Пакистан побара екстрадиција на лидерот на Техрик-е-Талибан, Нур Вали Мехсуд, обвинет за повеќе терористички напади. По неуспешен воздушен напад врз Кабул, авганистанските Талибанци возвратија со напади врз пакистански позиции во Курам и Северен Вазиристан, при што загинаа најмалку 58 војници, а беа заземени 25 гранични пунктови.
Како одговор, Исламабад ги затвори главните премини, со што ја прекина трговијата и движењето на цивилите.
„Не можеме да живееме меѓу војна и мир“
Пакистанскиот министер за одбрана Хаваџа Мухамед Асиф изјави дека земјата нема да дозволи состојба „меѓу војна и мир“.
„Доколку ситуацијата не се реши дипломатски, Пакистан ќе преземе неопходни мерки за заштита на својот територијален интегритет еднаш засекогаш“, рече тој.
Авганистанскиот премиер Мула Хасан Акхунд возврати дека неговата земја „нема да попушти дури ни под закана од војна“.
„Бомбардирањето на Авганистан не ја покори земјата ниту за Американците во две децении, ниту ќе успее за Пакистан“, изјави тој.
Аналитичари: целосна војна е малку веројатна
Според индексот Global Firepower, Пакистан е 12-та воена сила во светот, додека Авганистан е на 118-то место. Пакистан располага со повеќе од 650.000 активни војници, нуклеарен арсенал и модерно оружје, додека талибанската војска користи претежно лесно вооружување и има искуство во герилска војна.
И покрај воената супериорност на Пакистан, аналитичарите не очекуваат отворена војна. „Конфликтот меѓу Пакистан и Авганистан е бесмислен и штетен за двете страни“, вели Абдул Сајед, експерт за џихадизам од Универзитетот Лунд. „Дипломатијата и соработката се единствениот начин да се избегне катастрофа.“
