Проверете ги таваните и фиоките – старите телефони можат да вредат илјадници евра
Старите мобилни телефони, како Nokia 3310, Motorola Razr или првиот iPhone, денес можат да вредат и до 11.500 евра. Колекционерите бараат ретки модели од 1990-тите и 2000-тите. Проверете дали во вашата фиока има скриено богатство.
Во времето кога новите телефони стануваат застарени по една година, ретро технологијата повторно се враќа на сцена. На таваните и во фиоките на многу домови сè уште лежат уреди кои пред две децении беа врв на иновацијата – старите мобилни телефони. Но денес тие можат да донесат вистинско богатство.
Според британскиот портал Gumtree, пазарот на колекционерска технологија од 1990-тите и почетокот на 2000-тите доживува огромен раст. Ретки модели како Nokia 3310, Motorola Razr, BlackBerry или првиот Apple iPhone станаа барана стока меѓу љубителите на дигиталната историја.
Иако модерните смартфони имаат стотици функции, старите модели денес вредат токму поради тоа што се ретки и претставуваат симбол на едно минато време. Колекционерите не ги купуваат за користење, туку поради приказната, дизајнот и носталгијата што ја будат.
Феноменот на ретро технологијата
Бен Вуд, основач на британскиот Музеј на мобилни телефони, објаснува дека луѓето ретко купуваат стари телефони за практична употреба, бидејќи многу веќе не функционираат. „Купувачите се водат од носталгија и од идејата дека вредноста на овие уреди ќе расте со текот на времето,“ вели Вуд.
Тој советува сите што чуваат стари телефони дома да ја проверат нивната вредност на eBay. Според него, пазарот е активен и цените постепено растат.
Цените на ретките уреди се изненадувачки високи:
Првиот iPhone од 2007 година, во совршена состојба, може да достигне цена и до 10.000 фунти (околу 11.500 евра).
Луксузните Vertu Signature модели често се продаваат за неколку илјади фунти.
Дури и класичните BlackBerry телефони, кои се продаваат за 30 фунти, во лимитирани изданија како Porsche Design достигнуваат и до 1.700 евра.
Со растот на интересот за „Viintagе“ технологија, не е чудно што старите телефони стануваат вредни колекционерски предмети. Сè што порано изгледало застарено, денес има емоционална и историска вредност.
Затоа, пред да ја фрлите старата Nokia или Sony Ericsson, проверете ја на интернет. Можно е токму во вашата фиока да стои уред вреден повеќе отколку што мислите.
