Аријана Гранде во новото продолжение на „Meet the Parents“
Аријана Гранде ќе се појави покрај Роберт Де Ниро во новото продолжение на култната комедија „Meet the Parents“, во продукција на Universal.
По големиот успех на првиот дел од мјузиклот „Wicked“, Аријана Гранде и продукциската куќа „Universal Pictures“ повторно здружуваат сили за нов проект. Овој пат, пејачката се приклучува на актерската екипа на новото продолжение од култната комедија „Meet the Parents“ (Запознавање со родителите).
Веста предизвика вистинска еуфорија меѓу фановите на Гранде, но и кај љубителите на франшизата која со години ја гради својата популарност. Премиерата на новиот филм е закажана за 25 ноември следната година, а режијата повторно ја презема Џон Хамбург — истата личност што стоеше зад сценаријата за трите претходни наслови: „Meet the Parents“, „Meet the Fockers“ и „Little Fockers“.
Иако конкретните детали за улогата на Аријана сè уште не се откриени, потврдено е дека во новото продолжение ќе се појави и оригиналната актерска постава: Роберт Де Ниро, Бен Стилер, Тери Поло и Блајт Данер.
Проектот се реализира под водство на исклучително позната продукциска екипа: Џејн Розентал и Роберт Де Ниро (Tribeca Productions), Џеј Роуч (Delirious Media), Бен Стилер и Џон Лешер (Red Hour Films), како и Џон Хамбург (Particular Pictures).
Првиот филм од оваа хумористична серија постигна неверојатен успех со над 330 милиони долари заработка на глобалниот бокс офис, со што се позиционираше како седмиот најуспешен филм во 2000 година. Продолженијата дополнително ја зацврстија репутацијата на франшизата, а вкупната заработка од сите досегашни делови надмина 1,13 милијарди долари ширум светот.
Аријана Гранде неодамна заблеска во улогата на Глинда во „Wicked“, каде доби одлични критики и номинации за Оскар, Златен глобус, БАФТА и САГ за најдобра споредна женска улога. Филмот освои и Оскари за костимографија и продукциски дизајн, а беше номиниран и за најдобар филм.
