Кремасти тестенини со лосос и спанаќ

Подгответе лесен и вкусен оброк со (шпагети) тестенини, свеж лосос и спанаќ во кремаст сос. Идеален рецепт, богат со вкус и здрави состојки.

Ако барате идеја за романтична вечера или едноставно вкусен и хранлив оброк, овој рецепт за кремасти тестенини со лосос и спанаќ е вистинскиот избор. Лесен е за подготовка, богат со вкус и совршено балансиран со протеини, зеленчук и кремаст сос.

За овој Рецепт (за 2 лица) е потребно:

2 свежи филети лосос
1 домашен кромид
200gr. XXL тестенини (или шпагети)
100gr. свеж спанаќ
150ml. павлака за готвење
2 лажици сончогледово масло
сол и зачини по избор

Начин на подготовка

1. Варење на тестенините

Во голем сад ставете солена вода да зоврие и сварете ги тестенините според упатството на пакувањето.
Кога ќе бидат готови, исцедете ги, но заштедете половина чаша од водата за готвење – ќе ви користи за сосот.

2. Подготовка на лососот

Филетите лесно посолете ги и зачинете по вкус. Загрејте 1 лажица сончогледово масло во тава и пржете ги 3–4 минути од едната страна и 2–3 минути од другата страна, додека не добијат златна кора.
Отстранете ги од тавата и исечете ги на парчиња или издробете ги со вилушка.

3. Кремаст сос со кромид и спанаќ

Во истата тава додадете уште 1 лажица масло.
Пропржете ситно исечкан кромид додека не стане проѕирен.
Додадете го спанаќот и пропржете кратко, само колку да омекне.
Вмешајте ја павлаката за готвење, зачинете по вкус, а ако сосот е премногу густ – разредете го со малку од водата во која се вареа тестенините.

4. Соединување на вкусот

Додадете ги варените тестенини во сосот и нежно измешајте за да се обвијат со кремастата текстура.
На крај, додадете ги парчињата лосос – внимателно, за да не се распаднат целосно.

Совети за совршен резултат

Наместо сончогледово масло, може да користите маслиново за поароматичен вкус.
Ако сакате дополнителна свежина, посипете со малку лимонов сок врз готовото јадење.
Овој рецепт оди одлично со чаша бело вино.

Овој рецепт за тестенини со лосос и спанаќ е идеален пример како со едноставни состојки можеш да создадеш ресторантско јадење во сопствената кујна. Кремаст, здрав и вистинско уживање за сите сетила – ќе стане еден од твоите омилени рецепти!