Трагедија на Нова година во Кран-Монтана
Десетици лица се сметаат за загинати, а околу сто се повредени во катастрофален пожар што избувнал за време на новогодишна прослава во ексклузивен ноќен бар во швајцарскиот ски-центар Кран-Монтана, соопштија локалните власти. Несреќата се случила во раните утрински часови на 1 јануари и веќе се вбројува меѓу најтешките цивилни трагедии во Швајцарија во последните години.
Пожарот избувнал околу 1:30 часот по полноќ во lounge-барот „Le Constellation“, сместен во срцето на одморалиштето, на неколку минути од главните жичарници. Во моментот на инцидентот, во објектот имало околу сто гости. Иако барот е проектиран за поголем капацитет, просторот бил преполн поради новогодишната ноќ, по која локалот е особено познат по луксузни и масовни забави.
Кантоналната полиција на Валис информира дека точниот број на жртвите сè уште не е официјално потврден, но десетици лица се водат како загинати. Над сто луѓе се повредени, дел од нив со тешки изгореници и сериозни повреди од вдишување чад. Поради тежината на ситуацијата и планинскиот терен, голем број повредени биле пренесени со медицински хеликоптери во болници надвор од регионот. Во спасувачката акција учествувале десетици амбулантни возила и најмалку десет хеликоптери.
🚨 🇨🇭 ALERTE INFO : Vidéo terrifiante où l’on voit le feu se propager à grande vitesse dans un bar de Crans-Montana, sous les yeux de nombreuses personnes qui tentent ensuite de s’échapper. pic.twitter.com/W4zQuAMO2J
— Wolf 🐺 (@PsyGuy007) January 1, 2026
Шефот на кантоналната полиција изјави дека инцидентот во оваа фаза не се разгледува како терористички чин, туку како трагична несреќа предизвикана од пожар. Јавниот обвинител на Валис нагласи дека истрагата е во почетна фаза и дека ќе биде сложена и долготрајна, имајќи ја предвид сериозната штета на објектот и големиот број жртви. Поради почит кон семејствата на настраданите, властите засега не објавуваат дополнителни детали.
Сведоци кои биле присутни во барот изјавиле дека непосредно пред избувнувањето на пожарот, персоналот служел шампањ со запалени искрички – практика честа во ноќните клубови за време на прослави. Според нив, искричките биле опасно блиску до дрвениот таван. Само неколку секунди подоцна, таванската конструкција се запалила, а огнот се проширил со неверојатна брзина низ целиот простор.
🚨🇨🇭🔥 Des personnes prises au piège par les flammes dans le bar de Crans-Montana tentent désespérément de s’échapper par la seule issue, qui est bloquée. (témoins) pic.twitter.com/aBQXtKRME9
— SuisseAlert (@SuisseAlert) January 1, 2026
Еден очевидец раскажал дека поминале едвај десет секунди од моментот кога таванот се запалил до целосното зафаќање на барот со оган. Во тие мигови настанала масовна паника – луѓето врескале, се туркале и очајнички се обидувале да стигнат до излезите. Друг сведок изјавил дека пламенот се однесувал „како експлозија“, што упатува на тоа дека материјалите во ентериерот биле исклучително запаливи.
Полицијата објави снимки од местото по гаснењето на пожарот, на кои се гледа целосно уништената внатрешност на барот и терасата, со превртени маси, скршени столчиња и расфрлани лични предмети – неми сведоштва за хаосот и паниката. Поширокото подрачје околу локалот беше затворено, а над Кран-Монтана беше воведена привремена забрана за летање за да им се овозможи непречена работа на спасувачките и истражните служби.
Интервенциите на итните служби траеја со часови. Пожарникарите го локализираа и целосно го изгаснаа огнот, додека медицинските тимови продолжија со евакуација и згрижување на повредените. Властите најавија прес-конференција откако ќе бидат потврдени сите релевантни факти и бројот на жртвите во трагедијата што ја потресе Швајцарија уште на самиот почеток од новата година.
