„Тато, ќе ја убиеш мама“: Малата Катја тропала кај соседите и барала помош за Ивана
Соседи сведочат дека малата Катја тропала по вратите барајќи помош за мајка ѝ Ивана, која со неа скокна од зграда во Скопје.
Соседите на Ивана Јовановска (31), која на 2 март заедно со својата шестгодишна ќерка Катја Јовановска скокна од шести кат од зграда во Скопје, сведочат дека со месеци слушале расправии и повици за помош од нивниот стан.
Според соседката Тања С., малата Катја често излегувала од станот и тропала на вратите на соседите барајќи помош за својата мајка.
„Се слушаа кавги и викање со месеци. Малата Катја знаеше да избега од станот и да тропа по вратите во зградата, барајќи некој да ѝ помогне на мајка ѝ“, изјавила Тања за медиумите.
Таа додава дека соседите повеќепати пријавувале семејно насилство кај надлежните институции, но, според неа, немало соодветна реакција.
„Тоа не беше пријавено само еднаш. Со месеци слушавме што се случува. Можеби трагедијата можеше да се спречи ако институциите реагираа поодлучно“, вели соседката.
Тања истакнува дека еднаш, по полициска интервенција, таа поднела жалба до внатрешната контрола поради однесувањето на полицајците кои дошле на местото на настанот.
Според нејзините зборови, Ивана била повлечена личност и ретко зборувала за проблемите што ги имала.
„Беше многу затворена. Дури и кога некој од соседите ќе ја прашаше што се случува, само велеше дека не знае. Се гледаше дека е исплашена“, вели Тања.
Според информациите во медиумите, Ивана во моментот на трагедијата била во постапка за развод од сопругот Стојанче Јовановски, кој во меѓувреме се соочува со обвиненија за семејно насилство и други кривични дела.
