Сведоштво на мајка на Ивана: Насилство во семејството
Мајката на Ивана сведочеше денес, за долгогодишно семејно насилство врз нејзината ќерка, опишувајќи модрици, страв и вознемирувачки изјави од малолетното дете. Според неа, насилството траело континуирано, но жртвата ретко го признавалa.
Во судско сведочење што предизвика силни реакции во јавноста, Љубица Стојановска ја опиша врската меѓу нејзината ќерка Ивана и обвинетиот Стојанче Јовановски, укажувајќи на сериозни индиции за семејно насилство кои, како што рече, траеле подолг временски период.
Сомнежи за насилство уште од почетокот
Според исказот, односите меѓу двајцата започнале со кратко познанство кое брзо прераснало во брак. Во тој период, семејството на Ивана им давало финансиска и логистичка поддршка, додека двајцата живееле како потстанари.
Мајката сведочеше дека уште од раните фази забележувала знаци кои укажувале на можно насилство. На телото на нејзината ќерка често забележувала модринки, но објаснувањата што ги добивала биле дека станува збор за случајни повреди.
Вознемирувачки сведоштва од малолетното дете
Особено загрижувачки, според сведочењето, биле зборовите што ги слушала од својата внука Катја. Таа пренесувала сцени од домот кои укажувале на агресивно однесување и вербални навреди.
Мајката изјави дека детето користело навредлив речник кој, според неа, го преземало од однесувањето на таткото. Во еден од исказите, детето опишало сцена на физичко насилство врз мајката, што дополнително ги зајакнало сомнежите.
Инциденти и интервенција на полицијата
Стојановска опиша и конкретен настан во текот на 2021 година, кога, по доцноноќен повик од обвинетиот, пристигнала во станот на својата ќерка. Таму, како што сведочеше, затекнала тензична и вознемирувачка атмосфера.
Според неа, обвинетиот бил агресивен и вербално навредлив, додека Ивана била видно исплашена. Во текот на инцидентот, дошло и до физички напад, по што била повикана полиција. Иако службениците интервенирале, ситуацијата, според сведочењето, не резултирала со подолгорочни мерки за заштита.
-Некогаш ќе ја видев на рацете модра, окото модро, рече паднала од тротинет. Катја имаше две години, на 15-16 август 2021 кога ми се јави зетот во еден ноќе, ми рече „тетка Љубица, дојди да си ја земеш ќерка ти, Ивана ку….а“. Некој во еден часот ноќе така да ти каже… За 10 минути ноќе, пешки стасав до нивниот стан. Беше многу нервозен, шеташе, зборуваше. Го прашав што е работата, Ивана беше многу вознемирена, седеше на каучот, ја гушкаше Катја, а Стојанче беше многу лут нервозен, шеташе.
Не можам да го преболам зборот што ми го кажа, рече дека „моја Ивана барала поголем да ја задоволи, а тој досега не спиел со друга жена“. Кога дојде полиција, го извадија надвор во ходник да разговараат. Еден од полицајците беше со нас во соба. Ивана беше многу исплашена, пред да дојде полицијата Стојанче ја удри, но јас застанав меѓу нив. Со боксови ја удираше, додека Катја ѝ беше во рацете на Ивана. Ивана беше исплашена и само викаше „сè нека земе и стан и сè, само ќерката да ми ја остави“. Полицијата им рече „ајде смирете се малку, да биде сè во ред“. И си заминаа, рече мајката на Ивана.
Контрола, страв и прикривање на проблемите
Мајката нагласи дека нејзината ќерка живеела под постојан притисок и контрола. Често била во комуникација со сопругот додека престојувала кај своето семејство, што укажувало на ограничена слобода.
И покрај очигледните проблеми, Ивана ретко зборувала отворено за ситуацијата. Наместо тоа, се обидувала да ги минимизира случувањата, уверувајќи дека состојбата ќе се подобри.
Финансиски и семејни околности
Во сведочењето беше посочено и дека станот во кој живееле првично бил на име на Ивана, но подоцна, по барање на обвинетиот, биле направени промени во сопственичката структура и финансиските обврски.
Овие околности, според мајката, дополнително ја усложниле ситуацијата и ја зголемиле зависноста на нејзината ќерка.
