„СЕЈФ СИТИ“ ОД УТРЕ ПОЧНУВА СО КАЗНУВАЊЕ!
Од утре започнува целосната примена на „Сејф сити“. Сообраќајните камери автоматски ќе казнуваат за брзина, црвено светло и други прекршоци.
Од утре официјално стапува во сила целосната примена на системот „Сејф сити“, со што завршува периодот на тестирање и издавање предупредувања. Сообраќајните камери поставени на фреквентни раскрсници и сообраќајници во Скопје, како и во други градови низ државата, од утре ќе ги регистрираат прекршоците автоматски.
Системот е дизајниран да ги детектира најчестите и најризични сообраќајни прекршоци, меѓу кои се: пречекорување на дозволената брзина, минување на црвено светло, управување со нерегистрирано возило, како и неправилно запирање и паркирање. Од надлежните институции информираат дека техничката имплементација е целосно завршена и дека од утре нема да се применува толеранција.
Казните за регистрираните прекршоци ќе се доставуваат автоматски, без присуство на сообраќаен полицаец, по електронски пат и преку пошта. Од Министерството за внатрешни работи апелираат граѓаните навремено да ги проверат и ажурираат своите лични податоци за да избегнат доцнење или недостиг на известувања.
Законот предвидува можност за намалување на износот на казната доколку истата се плати во законски утврдениот рок.
