Револуција во фудбалот: Јапонците како Југославија пред 35 години
Јапонската Џеј лига воведува експеримент без реми во сезоната 2026 – по нерешен резултат следуваат пенали и нов систем на бодирање. Дали ова е иднината на фудбалот?
Ремијата наскоро би можеле да станат минато – барем ако се суди според експериментот што го започна Јапонија. Џеј лигата покрена храбра реформа што потенцијално може да го промени начинот на функционирање на лигашкиот фудбал.
Најсилната јапонска лига (Ј1) одлучи во преодната сезона 2026 година да укине една од најтрадиционалните работи во спортот – нерешениот резултат.
Секој натпревар мора да има победник
Според новото правило, ниту еден меч нема да заврши без победник. Доколку резултатот е израмнет по 90 минути, веднаш ќе се изведуваат пенали за да се добие триумфатор.
Пораката е јасна – секое коло мора да донесе конечен епилог.
Нов систем на бодирање
Основната бодовна структура делумно останува иста:
Победа во регуларниот тек носи 3 бода
Пораз по 90 минути носи 0 бодови
Но, новина е системот по пенал-серија:
Победникот по пенали ќе добие 2 бода
Поразениот тим ќе освои 1 бод
Класичниот бод за реми заминува во историјата, а системот има цел да ја награди храброста и натпреварувачкиот ризик.
Преодна сезона како мост кон европскиот модел
Ова правило ќе важи само за преодната сезона од февруари до јуни 2026 година. Јапонија го менува календарот на натпреварување за да се усогласи со европскиот модел – новата сезона ќе започнува во август, а ќе завршува во мај.
Скратената кампања ќе послужи како транзициски период меѓу двата системи.
Засега челниците на лигата не планираат трајно воведување на ова правило, но доколку реакциите од клубовите и навивачите бидат позитивни, можно е експериментот да прерасне во долгорочно решение.
Историјата веќе видела сличен обид
Јапонија не е првата што се обидува да ги „укине“ ремијата. Сличен систем постоеше во Првата лига на Југославија од 1988 до 1992 година. По нерешен резултат се шутираа пенали, при што победникот добиваше бод, а поразениот остануваше без освоени поени.
Експериментот траеше четири сезони, но не опстана на долг рок.
Почеток со драматични мечеви
Веќе во првото коло од новиот систем беа одиграни четири натпревари кои беа решени по изведување пенали по нерешен резултат во регуларниот дел.
Дали Јапонците ќе успеат таму каде што други не успеале, останува да се види. Но едно е сигурно – со укинувањето на ремијата, Џеј лигата отвори дебата што може да одекне далеку надвор од границите на Јапонија.
Фудбалот каков што го познаваме можеби навистина влегува во нова ера.
