Најчести зимски болести и колку трае закрепнувањето
Во текот на зимата најчесто се шират настинки, грип, ковид-19 и RSV, како и стомачни вируси. Лекарите објаснуваат дека времетраењето на болеста зависи од видот на вирусот и имунитетот, но кај повеќето инфекции симптомите траат од неколку дена до неколку недели. Навременото лекување го скратува периодот на закрепнување.
Со падот на температурите и зголемениот престој во затворени простории, респираторните инфекции повторно се во пораст. Според матичните лекари и специјалистите по семејна медицина, оваа сезона е обележана со истовремено присуство на повеќе вируси – грип, ковид-19 и респираторниот синцицијален вирус (RSV), појава што дел од експертите ја нарекуваат „флурона“.
Ваквата комбинација, заедно со сувиот и студен воздух, го ослабува имунитетот и го олеснува преносот на инфекции меѓу луѓето.
Кои се најчестите зимски заболувања
Лекарите издвојуваат неколку инфекции што доминираат во текот на зимските месеци:
обична настинка (риновирус)
грип
ковид-19
респираторен синцицијален вирус (RSV)
бронхитис
пневмонија
конјунктивитис
синузитис
стрептококна ангина
стомачен вирус (најчесто норовирус)
Овие заболувања најчесто се пренесуваат преку капки при кашлање и кивање, но и преку контакт со загадени површини.
Колку трае опоравувањето
Времетраењето на болеста зависи од видот на инфекцијата и од индивидуалниот имунолошки одговор:
обична настинка: 7 до 10 дена
грип: 7 до 14 дена
бронхитис: до 3 недели
пневмонија: од 2 до 6 недели, во зависност од тежината
стрептококна ангина: 7 до 10 дена со антибиотска терапија
норовирус (стомачен вирус): до 3 дена
RSV: од 7 до 14 дена
Кај дел од пациентите, особено кај постарите лица и хронично болните, закрепнувањето може да трае подолго.
Кога треба да се побара лекарска помош
Медицинските стручњаци предупредуваат дека ако симптомите се влошуваат, траат подолго од вообичаеното или се јават компликации како висока температура, отежнато дишење и силна исцрпеност, неопходно е да се побара лекарски совет.
Како да се намали ризикот од зараза
Редовното миење раце, проветрувањето на просториите и избегнувањето на блиски контакти со лица со симптоми се меѓу основните превентивни мерки. Вакцинацијата против грип и ковид-19 останува една од најефикасните форми на заштита за ранливите категории.
Зимската сезона традиционално носи бран на вирусни инфекции, но со навремена реакција и соодветна грижа, најголем дел од заболувањата се надминуваат без трајни последици.
