Надојдената Тркања удави 220 грла добиток во Струмичко
Наглото надоаѓање на реката Тркања во струмичко предизвика сериозна штета, при што во селото Костурино се удавиле околу 100 овци и 120 јагниња. Сточарите не успеале да реагираат поради силата и брзината на водата, која за неколку минути ја поплавила шталата.
Водата за неколку минути однела цело стадо
Обилните врнежи што го зафатија југоисточниот дел од земјата предизвикаа нагло зголемување на водостојот на реката Тркања, која вчера попладне се излеала на локацијата позната како „Шепово“, во атарот на селото Костурино, струмичко.
Според сведоштвата на сопствениците, водата се кренала за помалку од десет минути и со голема сила ја зафатила шталата во која се наоѓал добитокот. Надојдената река достигнала височина од околу два метра, што им оневозможило на сточарот и неговиот брат да ги отворат вратите и да ги извлечат животните.
Опасност и за луѓето
Сточарот изјавил дека во обид да реагираат навреме, тој и неговиот брат се нашле во сериозна опасност и за малку не биле повлечени од надојдената вода. Според него, целото стадо било однесено за неколку минути, без можност за интервенција.
Настанатата штета денеска била пријавена во Општина Струмица, а случајот е евидентиран и кај надлежните институции, кои во наредните денови треба да излезат на терен и да извршат проценка на материјалната загуба.
Поплавени површини и дворови во неколку села
Од Регионалниот центар за управување со кризи во Струмица информираат дека се регистрирани поплавени земјоделски површини и дворови во селата Муртино и Сачево. Според нивните податоци, водостојот на реките постепено се стабилизира, особено на реката Тркања, која вчера се излеала и на влезот во Струмица.
Во меѓувреме, екипи на ЈП „Плаваја“ од Радовиш интервенираат на мостот на истоимената река меѓу селата Јаргулица и Покрајчево, каде што сообраќајот се одвива под посебен режим. Во општина Валандово, Калковската река се излеала преку регионалниот пат Валандово–Удово, но со ангажирање на механизација состојбата се санира.
Ангажирана механизација и превентивни мерки
Од ЦУК информираат дека на критичните точки е ангажирана механизација од комуналните претпријатија за расчистување на наносите и обезбедување на коритата. На одредени локации се поставуваат и вреќи со песок како превентивна мерка против ново излевање.
Според податоците на Управата за хидрометеоролошки работи, заклучно со утринските мерења во Струмица наврнале околу 20 литри дожд на квадратен метар, што значително придонело за зголемување на водостојот на помалите реки и порои.
Надлежните служби најавуваат континуирано следење на состојбата и апелираат граѓаните во ризичните подрачја да бидат внимателни и да ги почитуваат препораките на институциите.
