Меси се повреди пред големиот турнир со Аргентина

Лионел Меси предизвика загриженост кај навивачите на Интер Мајами и Аргентина откако заработи повреда за време на натпреварот против Филаделфија Јунион во МЛС лигата.

Аргентинската суперѕвезда почувствува болка во левата нога по изведување слободен удар и неколку моменти подоцна побара замена, напуштајќи го теренот во 73. минута од дуелот кој Интер Мајами го доби со спектакуларни 6-4.

Меси почувствувал болка по слободен удар

38-годишниот Меси се фати за задниот дел од левиот бут веднаш по изведувањето на еден прекин, што веднаш ги загрижи стручниот штаб и навивачите на стадионот.

Иако видливо чувствуваше непријатност, Аргентинецот самостојно го напушти теренот без помош од медицинскиот тим.

Засега нема официјални информации за сериозноста на повредата, но првичните реакции од клубот се умерено оптимистички.

Тренерот на Интер Мајами, Гилермо Хојос, изјави дека не верува оти станува збор за посериозен проблем и посочи дека тежок терен и замор најверојатно придонеле за непријатноста што ја почувствувал Меси.

The moment Messi chose not to risk Argentina’s World Cup with Inter Miami tonight pic.twitter.com/9h0qmuMqgQ

— J. 🇵🇸 (@Messilizer0) May 25, 2026

Одлична сезона во МЛС

И покрај возраста, Меси игра одлична сезона во американската лига. Во досегашните 14 натпревари има постигнато 12 голови и осум асистенции, потврдувајќи дека и понатаму е клучен играч на Интер Мајами.

Неговиот придонес е еден од главните фактори за офанзивната игра на тимот, кој сезонава бележи сериозен напредок.

Загриженост пред настапот со Аргентина

Повредата доаѓа во чувствителен период, непосредно пред претстојното Светско првенство, каде Аргентина ќе ја брани титулата светски шампион.

Се очекува Меси повторно да ја предводи репрезентацијата, иако конечниот список сè уште не е официјално објавен.

Аргентина турнирот ќе го отвори на 16 јуни во рамки на Групата Ј, со натпревар против Алжир, а потоа ќе игра и против Австрија и Јордан.

Пред стартот на шампионатот, „гаучосите“ ќе одиграат и контролни натпревари против Хондурас и Исланд.