Медицинско чудо во Лондон: Родено бебе по трансплантација на матка од починат донор

Во Лондон е испишана нова страница во медицинската историја – родено е машко бебе чиешто мајка ја изнела бременоста благодарение на трансплантирана матка добиена од починат донор. Станува збор за прв ваков случај во Обединето Кралство.

Бебето по име Хуго Пауел е родено со тежина од 3,09 килограми. Неговата мајка, Грејс Бел, претходно добила трансплантација на матка од донор кој починал, што го прави овој породување исклучително значаен медицински настан. Досега, во Европа се евидентирани само уште два слични случаи.

Грејс Бел е родена со редок генетски пореметувач познат како MRKH синдром, состојба при која матката е неразвиена или целосно отсутна. Уште во тинејџерските години ѝ било кажано дека никогаш нема да може да изнесе бременост.

По успешната трансплантација во 2024 година, таа започнала процес на ин витро оплодување, а бременоста била остварена неколку месеци подоцна. Хуго е роден во декември минатата година, а неговата мајка неговото доаѓање на светот го опишува како „вистинско чудо“.

„Никогаш не верував дека ова е можно. Ова е најсреќниот момент во мојот живот“, изјави Бел, додавајќи дека секојдневно мисли на донорката и нејзиното семејство.

Матката што била трансплантирана не е трајно решение. Лекарите објаснуваат дека по одлуката семејството да нема повеќе деца, органот ќе биде отстранет за да се избегне доживотна терапија со имуносупресивни лекови.

Во светски рамки, досега се родени околу 25 до 30 бебиња благодарение на трансплантација на матка од починати донори, додека поголемиот дел од ваквите интервенции се изведуваат со живи донори, најчесто членови на семејството.

Раѓањето на малиот Хуго веќе е прогласено за еден од најзначајните медицински настани на годината, а за неговата мајка најважно е едно: „Станав мајка – сè друго е споредно.“