Лажен лекар измамил 84-годишна битолчанка за 9.600 евра
84-годишна жена од Битола била измамена за 9.600 евра откако измамник ѝ се претставил како лекар и ја убедил дека е потребна итна операција за нејзината ќерка.
Осумдесет и четиригодишна жена од Битола пријавила во полиција дека била измамена за сума од 9.600 евра, откако непознато лице ѝ се претставило како лекар и ја довело во заблуда.
Според информациите од СВР Битола, на 25 февруари 2026 година околу 16:00 часот, жената пријавила дека претходно добила телефонски повик од лице кое ѝ кажало дека нејзината ќерка се здобила со скршеници и дека е неопходна итна операција, за што требало да се платат пари.
Верувајќи во приказната, таа ги предала парите на лице кое дошло пред нејзината зграда. Подоцна, откако стапила во контакт со својата ќерка, сфатила дека станува збор за измама.
Од полицијата информираат дека се преземаат мерки за расчистување на случајот и апелираат до граѓаните, особено повозрасните лица, да бидат внимателни и да не наседнуваат на вакви телефонски измами.
