Истрага за врсничко насилство во Ѓорче: 14 на разговор

Случајот со врсничко насилство во скопската населба Ѓорче Петров ја отвори темата за безбедноста на децата и одговорноста на институциите. Надлежните уверуваат дека постапката е во тек, но пораките што доаѓаат се дека проблемот е подлабок и бара поширок ангажман.

Министерството за внатрешни работи веќе презема конкретни чекори – во рамки на истрагата се повикани 14 лица на разговор, а дел од нив може да се соочат со понатамошни процесни дејствија. Случајот се води во координација со Јавното обвинителство, со посебен пристап поради фактот што станува збор за малолетници.

Тошковски: Ова не е изолиран проблем

Министерот за внатрешни работи Панче Тошковски истакна дека врсничкото насилство не смее да се третира како поединечен инцидент, туку како сериозен општествен предизвик.

Според него, дел од повиканите на разговор се и родители на учениците вклучени во случајот, што дополнително ја нагласува потребата од активна улога на семејството. „Проблемот постои и кога не е видлив во јавноста“, порача тој, додавајќи дека институциите ќе останат фокусирани на ваквите појави.

Мултиинституционален пристап наместо само казни

Од МВР потенцираат дека борбата против врсничкото насилство не може да се сведе само на репресивни мерки. Потребен е системски пристап во кој ќе бидат вклучени училиштата, социјалните служби и родителите.

Министерот апелираше за поголема вклученост на родителите во воспитувањето и образовниот процес, нагласувајќи дека нивното однесување директно влијае врз развојот на децата и нивните постапки.

Нови мерки против насилство и технолошки решенија

Паралелно со истрагата, МВР најавува засилување на ингеренциите и капацитетите на полицијата, особено во делот на семејното насилство. Фокусот ќе биде ставен на потенцијалниот сторител, со цел побрза и поефикасна заштита на жртвите, во согласност со Истанбулска конвенција.

Дополнително, се работи на модернизација на интервенциските тимови преку воведување интелигентни бодикамери кои ќе снимаат во реално време. Овие уреди треба да овозможат попрецизно документирање на настаните на терен и да ја зајакнат доказната постапка.

Покрај тоа, се развива систем за прибирање аудио и видео докази преку мобилни уреди, со согласност на жртвата, што ќе придонесе и за превенција – потенцијалните сторители ќе знаат дека секое дејствие може да биде документирано.