Германија пресече: Ниту еден војник нема да оди во Газа
Германија нема да испрати војници во Појасот Газа. Берлин исклучува воена мисија, но најавува политичка и хуманитарна улога.
Германските војници нема да учествуваат во мировни или стабилизациски сили во Појасот Газа, потврди германскиот министер за надворешни работи Јохан Вадефул. Според него, ваквите мисии не се само симболично присуство, туку подразбираат реална употреба на сила за обезбедување мир — сценарио што, како што рече, тешко може да се замисли за германската армија во овој регион.
Вадефул нагласи дека учеството на Бундесверот во процесите поврзани со Газа не е предвидено „во догледна иднина“, со што Берлин практично ја затвора вратата за воено ангажирање.
Нема реални очекувања за меѓународна мисија
Според шефот на германската дипломатија, во моментов не постојат реални очекувања за формирање меѓународна мисија за стабилизација во Газа. Тој додаде дека Германија, доколку се создадат услови, може конструктивно да придонесе во рамките на структурите предвидени со резолуцијата на Советот за безбедност на ОН усвоена во октомври.
Политичка улога – да, воена – не
Иако Германија не е поканета да учествува во евентуален мировен совет, Вадефул не ја исклучи можноста за политичко ангажирање. Сепак, тој беше јасен дека секое идно решение мора да биде засновано на јасна политичка рамка и прецизно дефинирана безбедносна структура, поддржана од меѓународни и палестински безбедносни сили.
Безбедноста на Израел и хуманитарната помош
Германија, според Вадефул, има посебна историска и политичка одговорност кон безбедноста и опстанокот на Израел и е подготвена да делува како посредник во тој процес. Паралелно со тоа, Берлин веќе обезбедува значителен дел од хуманитарната помош за Газа и изрази подготвеност да преземе централна улога во идната реконструкција на разурнатиот појас.
