Еве за колку убиства се сомничи серискиот убиец од кумановско – сите жртви имале една заедничка особина
Истражителите проверуваат најмалку пет случаи на убиства во кумановско, со заеднички образец: повозрасни лица кои живееле сами и биле пронајдени мртви дома.
Серискиот убиец кој дејствувал во кумановскиот регион се сомничи дека е поврзан со најмалку пет случаи на убиства, а истражните органи не ја исклучуваат можноста бројот на жртви да биде и поголем. Станува збор за напади врз стари лица кои живееле сами, во рурални средини, што, според истрагата, претставува заедничка карактеристика кај сите случаи.
Росанка Трајковска, 86-годишна жена од селото Челопек, за малку ќе станела уште една жртва. Таа била нападната во сопствениот дом, но преживеала благодарение на случајна околност – ненадеен шум го исплашил напаѓачот, кој побегнал и ја оставил повредена. Иако поминале две недели од нападот, трагите од насилството сè уште се видливи, а семејството вели дека таа избегнала сигурна смрт по чиста среќа.
Напаѓачот бил откриен откако била пронајдена мртва 78-годишна жена во селото Старо Нагоричане. Жртвата живеела сама и била пронајдена претепана и задушена со перница. Првичните сомнежи упатувале и на можен грабеж. По овој случај, полицијата уапсила 25-годишник од селото Драгоманце, по што истрагата се проширила и на други сомнителни смртни случаи.
Според информации од истрагата, засега се проверуваат пет случаи – три од оваа година и два од минатата. Кај сите жртви е утврдено дека:
живееле сами,
биле повозрасни лица,
биле пронајдени мртви во своите домови,
телата биле делумно соблечени,
не била побарана обдукција бидејќи првично не биле забележани очигледни траги на насилство.
Истражните извори наведуваат дека можно е да постојат и постари случаи со сличен образец кои сè уште не се официјално поврзани со осомничениот. Ова отвора сериозни прашања за тоа колку долго убиецот дејствувал незабележано и дали имало пропусти во претходните постапки на институциите.
Случајот предизвика вознемиреност кај населението во селата околу Куманово, особено кај постарите луѓе кои живеат сами. Многумина сега стравуваат дека со години биле во опасност без да знаат.
