Две бебиња починале: Се повлекува позната детска храна низ цела Европа поради опасна контаминација
Француските власти истражуваат смрт на две бебиња поврзана со консумирање млечни формули на Nestlé контаминирани со цереулид. Во тек е масовно повлекување низ Европа.
По масовното повлекување на млечни формули за доенчиња во десетици земји ширум светот, француските здравствени власти започнаа истрага за смртта на две бебиња, за кои се наведува дека консумирале формули на компанијата Nestlé, опфатени со повлекувањето поради можна контаминација со токсичната супстанција цереулид (cereulide).
Од француското Министерство за здравство за Euronews соопштија дека засега не е научно потврдена директна причинско-последична врска, но истрагата е во тек. Компанијата Nestlé информира дека целосно соработува со надлежните институции и дека транспарентно ги доставува сите побарани информации.
Во меѓувреме, владата на Фландрија во Белгија потврди случај на заболување кај доенче кое во јануари 2026 година консумирало контаминирана формула. Детето имало повраќање и воденаст пролив, но по десетина дена целосно се опоравило. Лабораториските анализи потврдиле дека причината за симптомите била интоксикација со цереулид од млечниот производ.
Надлежните служби во Белгија потврдиле дека серискиот број на производот припаѓа на сериите што се повлечени од пазарот на национално ниво.
Што е цереулид и зошто е опасен?
Цереулид е термостабилен токсин што го создава бактеријата Bacillus cereus и може да се развие во храна, вклучително и во млечни формули. Најчести симптоми кај доенчињата се нагло повраќање и пролив, кои се јавуваат од 30 минути до три часа по консумирањето и често личат на стомачна инфекција.
Според официјалните податоци, контаминацијата започнала во декември минатата година, а Nestlé Франција на 10 декември 2025 година првично повлекла формули произведени во фабриката во Нунспит, Холандија, поради сомнеж за присуство на цереулид.
Подоцна било утврдено дека изворот на контаминацијата е ARA масло (арахидонска киселина) од кинески добавувач – состојка што се користи во премиум формулите за доенчиња.
Масовно повлекување во десетици земји
Од крајот на декември 2025 година, сите производители кои користат ARA масло од овој добавувач морале да спроведат сопствени проценки на ризикот. Во јануари 2026 година, Nestlé го проширил повлекувањето на повеќе серии во дури 60 земји, што претставува едно од најголемите повлекувања во историјата на компанијата.
Повлечени се производи од повеќе брендови, меѓу кои SMA, Beba, Guigoz, Alfamino, Aptamil и NAN, а слични мерки презеле и други компании како Lactalis, Danone, Vitagermine и Hochdorf Swiss Nutrition во Европа и пошироко.
Надлежните институции во повеќе земји апелираат родителите внимателно да ги проверат сериите на формулите и да не користат производи опфатени со повлекувањето, со цел заштита на здравјето на најмладите.
