Заложничка драма во германски град

Вистинска заложничка драма утрово го потресе германскиот град Цинциг, каде едно или повеќе лица држат заложници во филијала на банка во центарот на градот.

Според првичните информации од германската полиција, акцијата започнала околу 9 часот наутро, по што централното градско подрачје било целосно блокирано, а на терен биле распоредени специјални полициски единици и хеликоптери.

Инцидентот започнал по пристигнување на возило со пари

Според информациите на локалните власти, драмата започнала откако оклопно возило за транспорт на готовина застанало пред банката.

Во моментот кога еден од вработените или обезбедувачите излегол за да влезе во експозитурата, бил пресретнат од засега непознат маж, кој наводно му се заканил и иницирал заложничка ситуација.

Потоа, според првичните сознанија, напаѓачот влегол во банката и задржал повеќе лица како заложници.

Дел од заложниците наводно се наоѓаат во трезор

Полицијата соопшти дека според досегашните информации, во објектот можеби има повеќе напаѓачи.

„Во моментов се верува дека во банката се наоѓаат неколку сторители и повеќе заложници. Еден од заложниците е возач на возило за транспорт на готовина“, соопшти полицијата.

Според неофицијални информации, дел од лицата се наоѓаат во трезорот на банката.

Центарот на градот е блокиран

Поширокото подрачје околу банката е целосно обезбедено, а граѓаните се повикани да го избегнуваат центарот на градот додека трае полициската операција.

Од полицијата засега велат дека ситуацијата е стабилна и дека нема директна опасност за граѓаните надвор од блокираната зона.

„Во моментов нема опасност за граѓаните надвор од обезбеденото подрачје“, наведуваат властите.

Операцијата и натаму е во тек, а германските медиуми очекуваат повеќе детали во текот на денот.