Џим Кери шокира со нов изглед: долга темна коса до раменици
Џим Кери изненади со драстично променет изглед на 51. доделување на наградите Цезар во Париз, каде што доби почесна награда за животно дело.
Легендарниот комичар и актер Џим Кери беше награден со почесен Цезар за животно дело на 51. доделување на престижните француски филмски награди, одржано во Париз.
Додека публиката во салата го славеше неговиот богат уметнички опус, обожавателите ширум светот најмногу зборуваа за – неговиот целосно променет изглед.
Емотивно враќање во јавноста
Последните години не беа лесни за Кери. Контроверзии, тешки медиумски наслови и обвинувања поврзани со смртта на неговата поранешна партнерка, како и низа необични и интроспективни интервјуа, доведоа до тоа актерот речиси целосно да се повлече од јавниот живот.
Токму затоа неговото појавување во Париз привлече особено внимание. На свеченоста одржана во прочуената сала L’Olympia, 64-годишниот актер го прими почесниот Цезар – едно од најзначајните признанија во европската кинематографија.
Видливо трогнат од повеќеминутниот аплауз, Кери ѝ се обрати на публиката со краток говор на француски јазик. Тој потсети дека има француски корени – неговиот предок Марк Франсоа Кери пред три века се преселил од Сен-Мало во Канада.
„Со ова за мене се затвора еден круг“, изјави актерот, нагласувајќи дека наградата има и длабоко лично значење за неговото семејство.
Новиот имиџ ги запали социјалните мрежи
Покрај емоциите, вечерта ја одбележа и неговиот нов имиџ. Ѕвездата на филмот The Truman Show се појави со значително подолга, темна коса што речиси му допира до рамениците, поради што многумина тврдеа дека едвај го препознале.
Социјалните мрежи веднаш се преплавија со реакции:
„Едвај го препознав!“, напишаа некои корисници, додека други истакнаа дека ваквата трансформација е целосно во духот на неговата уметничка природа.
За оние што добро го познаваат неговиот лик и дело, промената не е изненадување. Кери отсекогаш бил камелеон – и на филмското платно и во животот. Можеби токму постојаната промена е неговата најголема константа.
Најдобар филм и политички пораки
Драмата Што нè поврзува на режисерката Карин Тардје ја освои наградата Цезар за најдобар филм, како и уште две признанија, меѓу кои и наградата за најдобро оригинално сценарио.
За најдобар странски филм беше прогласено остварувањето Една битка по друга на американскиот режисер Пол Томас Андерсон.
Доделувањето имаше и силна политичка димензија. Иранско-француската актерка Голшифте Фарахани му оддаде признание на иранскиот народ, истакнувајќи ја нивната децениска борба за слобода.
Наградата Цезар е највисокото филмско признание во Франција. Таа го носи името на вајарот Сезар Балдакани и се доделува од 1976 година.
