Дембеле со хет-трик ја однесе Франција до врвот во групата

Франција со убедлива победа го заврши настапот во групната фаза на Светското првенство, совладувајќи ја Норвешка со 4:1. Во центарот на вниманието беше Усман Дембеле, кој со извонреден настап и хет-трик уште во првото полувреме го трасираше патот до третата победа на „триколорите“ во исто толку натпревари.

Покрај првото место во групата, Французите си обезбедија и поповолна рута во продолжението од турнирот, а следен противник ќе им биде селекцијата на Шведска.

Дембеле го реши победникот уште пред паузата

Франција уште од самиот почеток наметна силно темпо и ја презеде контролата врз натпреварот. По неколку опасни напади, Килијан Мбапе во шестата минута испрати прецизно додавање до Усман Дембеле, кој сигурно ја затресе противничката мрежа за водство.

Дваесетина минути подоцна следуваше речиси идентична акција. Повторно асистент беше Мбапе, а Дембеле уште еднаш остана смирен пред голот и го удвои водството на Франција.

Норвешка накратко успеа да намали преку Тело Асгард, но радоста на Скандинавците траеше многу кратко. Во 32. минута Дембеле го комплетираше својот хет-трик со прецизен удар во долниот агол, поставувајќи 3:1 уште пред крајот на првото полувреме.

Со тоа тој стана само третиот француски фудбалер кој постигнал хет-трик на Светско првенство, по легендарниот Жист Фонтен и Килијан Мбапе. Воедно, тоа е вториот најбрз хет-трик во историјата на Мундијалите.

Франција ја потврди доминацијата во второто полувреме

Норвежаните имаа можност да се вратат во натпреварот веднаш по паузата, но голманот Мајк Мајнјан го одбрани пеналот на Јорген Штранд Ларсен и практично ги згасна надежите на противникот.

Иако норвешките фудбалери создадоа уште неколку опасни ситуации, француската одбрана остана сигурна, а конечниот резултат го постави Дезире Ду, кој во самиот финиш со удар со глава ја испрати топката во мрежата по центаршут на резервистот Бредли Баркола.

Ousmane Dembélé scored a first-half hat-trick as France made sure of the top spot in World Cup Group I with a ruthless 4-1 win ‌over Norway https://t.co/ZopMQeOpyF pic.twitter.com/9IGHEVdEZs

— Reuters (@Reuters) June 27, 2026

Победа посветена на Дешан

Француските репрезентативци натпреварот го одиграа без селекторот Дидие Дешан, кој отпатува во Франција за да присуствува на погребот на својата мајка.

Помошникот тренер Ги Стефан по мечот откри дека играчите сакале победата да му ја посветат токму на Дешан.

„Навистина сакавме да одиграме добар натпревар за него и да покажеме карактер. Ќе разговарам со него подоцна и сигурен сум дека ќе биде горд на настапот на момците“, изјави Стефан.

Според најавите, Дешан повторно ќе му се приклучи на националниот тим пред почетокот на елиминациската фаза.

Норвешка ги одмори главните адути

Норвешка на овој натпревар настапи со значително изменет состав. Селекторот Стале Солбакен одлучи да ги одмори речиси сите стандардни првотимци, меѓу кои Ерлинг Халанд и капитенот Мартин Одегард, бидејќи репрезентацијата веќе имаше обезбедено место во нокаут-фазата.

По натпреварот, Солбакен порача дека одлуката била донесена со една цел – тимот да остане свеж за продолжението од Светското првенство.

„Единствената причина поради која можеби некој би бил разочаран е што навивачите не ги видоа Халанд и Одегард. Но, ние сме тука за да стигнеме што подалеку на турнирот и моравме да размислуваме долгорочно“, изјави норвешкиот селектор.

Со освојувањето на првото место во групата, Франција во осминафиналето ќе се соочи со Шведска, додека Норвешка ќе ги одмери силите со Брегот на Слоновата Коска.