Данска испиша историја: Европското злато ги заокружи сите големи ракометни титули
Данска ја освои титулата на Европското првенство 2026 и стана првата ракометна репрезентација што ги обедини олимпиското, светското и европското злато по победата над Германија.
Ракометната репрезентација на Данска уште еднаш ја потврди својата доминација на светската сцена, откако во големото финале на Европското првенство 2026 триумфираше над Германија со 34-27. Со оваа победа, Данците станаа првата селекција што истовремено ги обедини олимпиското, светското и европското злато.
Во преполната сала во Хернинг, домашната селекција одигра моќен и зрел натпревар, предводена од извонредниот Матијас Гидсел, кој го заврши шампионатот како најдобар стрелец и МВП, како и од одличниот Питлик. Данска ја контролираше играта во клучните моменти и во финишот демонстрираше темпо што ретко кој тим може да го издржи.
Германија, и покрај поразот, остави одличен впечаток. За разлика од олимпиското финале пред година и пол, кога беше убедливо совладана, овојпат германската селекција одигра значително поконкурентно и долго време се одржуваше во резултатска неизвесност. Во поголемиот дел од натпреварот „панцерите“ беа на чекор зад противникот, создавајќи сериозен притисок.
Сепак, искуството и брзината на Данска пресудија во завршницата, кога домаќините ја зголемија предноста и го запечатија златото. Питлик беше најефикасен со осум гола, додека Гидсел и Хансен постигнаа по седум. Кај Германија, Гргиќ, Кнор и Гоља завршија со по пет погодоци.
Данска претходно ја совлада Германија и во групната фаза (31-26), а единствениот пораз на првенството го претрпе од Португалија, која на крајот го освои петтото место. Со ова европско злато, скандинавската репрезентација уште еднаш го зацврсти својот статус како апсолутен владетел на светскиот ракомет.
