Циклон носи дожд, снег и силен ветер: Температурите паѓаат до 10°C
Под влијание на циклонска активност, во Македонија следуваат врнежи, засилен ветер и значително заладување, со максимални температури околу 10 степени.
Во текот на утрешниот ден и четврток, времето ќе биде нестабилно со врнежи од дожд кои на повеќе места ќе бидат пообилни, над 20, а локално и над 30 литри на метар квадратен.
Дождот преминува во снег на планините
Поради продор на постудена воздушна маса, на планинските предели и повисоките места врнежите од дожд ќе преминуваат во снег, што ќе донесе зимска слика во делови од земјата.
Силен ветер до 70 km/h
Ќе дува засилен, повремено силен ветер од северен правец, кој на одредени места ќе достигнува брзина и над 70 km/h, што може да предизвика дополнителни проблеми.
Времето во Скопје
Во Скопје се очекува претежно облачно време со врнежи од дожд и засилен до силен северен ветер.
Кратко стабилизирање, па потопло време
Во петок и сабота времето ќе биде променливо облачно со услови за слаб локален дожд. Ветерот повторно ќе засили, особено во сабота.
Од недела следува период на стабилизирање на времето, со постепен пораст на температурите и повеќе сончеви периоди.
