Честито! Струјата поскапува – еве колку ќе плаќаме повеќе
Регулаторната комисија одобри поскапување на струјата по барање на ЕВН Хоум. Зголемување по сите блокови и евтина тарифа.
Регулаторната комисија за енергетика (РКЕ), постапувајќи по барање на ЕВН Хоум, официјално одобри зголемување на цената на електричната енергија за домаќинствата. Одлуката значи повисоки сметки за струја за граѓаните, распределени по сите тарифни блокови.
Според соопштеното на прес-конференција од претседателот на РКЕ, Марко Бислимовски, зголемувањето е следно:
Прв блок: зголемување од 2,45%
Втор блок: зголемување од 2,87%
Трет блок: зголемување од 3,33%
Четврти блок: зголемување од 3,84%
Евтина тарифа: поскапување од 2,50%
Ова значи дека најголем товар ќе почувствуваат домаќинствата со повисока потрошувачка, кои влегуваат во трет и четврти тарифен блок. Иако процентите на прв поглед изгледаат „умерени“, во реалност тие директно ќе се одразат врз месечните сметки, особено во периоди на зголемена потрошувачка.
Од РКЕ порачуваат дека одлуката е донесена врз основа на економски анализи и трошоците на снабдувачот, додека јавноста сè погласно реагира дека струјата повторно поскапува без реално подобрување на животниот стандард.
