НАТО тајно разгледува превентивен удар врз Русија?
НАТО анализира поагресивен одговор на руските хибридни закани и можно преминување кон превентивни акции.
Врвниот адмирал на НАТО открива дека Алијансата активно ја разгледува можноста да премине од реактивна на проактивна стратегија како одговор на засилените кибер напади, саботажи и нарушувања на воздушниот простор што им се припишуваат на Русија. Џузепе Каво Драгоне, претседател на Воениот комитет на НАТО, во интервју за „Фајненшл тајмс“ потврди дека се анализира посилна и поофанзивна рамка за справување со руските хибридни операции.
Тој нагласи дека во киберпросторот Алијансата сè уште делува претежно реактивно, но дека се разгледува идеја за поагресивен пристап, вклучувајќи проактивни акции. Европа во последните години беше погодена од серија хибридни инциденти, од пресечени подморски кабли во Балтикот до масовни кибер напади, дел со недокажано, но често сомнежливо руско потекло.
Ова ги засили повиците, особено од источните членки, НАТО да престане да реагира дури по нападот и да воспостави механизам за одвраќање преку возвратна акција. Проактивен одговор е најизводлив во доменот на кибер војувањето, каде што многу држави поседуваат напредни офанзивни капацитети. Ситуацијата е значително покомплицирана кога станува збор за физички саботажи или упади со беспилотни летала.
Драгоне изјави дека превентивниот удар може да се класифицира како форма на одбранбено дејствување, иако тоа би претставувало отстапување од традиционалниот пристап на Алијансата. Тој нагласи дека правната рамка, надлежноста и одговорноста за изведување вакви операции се клучните отворени прашања.
Како пример за успешна одвраќачка стратегија, НАТО ја истакнува мисијата „Балтичка стража“, која обезбедува интензивно патролирање со бродови, авиони и поморски беспилотни летала низ Балтичкото Море. Оваа мисија спречи повторување на инцидентите со пресечени подморски кабли од 2023 и 2024 година, за кои се сомневаше дека биле поврзани со руски бродови што ја заобиколуваат западната регулатива. Според Драгоне, фактот што оттогаш немало ниту еден сличен случај покажува дека ова одвраќање функционира.
